Thaina apikpa khungang amada lairabi lukhrabi mama macha anikhak leirami. Lukhrabi adugi mingna sanarei aduga magi pikliba macha nupa adugi mingna thouyangba haina kourami. Sanarei mapuroibana hek leikhidabadagi macha nupabu mahakna afang afangba thabak shu nomduna yokcharakpani. Mahakna matam ayambada macha nupagini haina karisu wathanlamde. Thabak wana shujarurabasu machagi minok amana mahaki nungaijabi haiba adu oirami. Aduga thouyangbasu angang macha ama oijarabasu mamagi awaba khangjarami. Aduna mahaknasu magi hek ngamjabi thaduna hotnaraga mamagi mateng pangjarami. Sanareina matam ayambana macha nupa ashigi tungi punshigidamak khanlaga mahakpu shenjao paiba mithoi mihenba mishak ama oihandaba yade haina khanjarami. Houjik mahakna ashuk yamna wana hotnariba punshi mahing ashigum mahakna nupana chaoraklaba kanda oihanba adudi pamlamde. Aduna mahakna leitrabasu leitana migi yumgi thabak kaya ama shuduna thouyangbabu mahei tamba tharami . Aduga thouyangbasu wakhal taba mamagi awaba uba angang ama oibana mahaksu mahei tamba aduda mapukning yamna changna hotnajarami. Nongmagi numitni thouyanhba mahei tamba adu halaktuna emungda changlaklaga mamabu koikou koujarami.
“ Ema ohh ema eikhoi emadubu kaida leikhra jatno eidi chak lambanasu loire . Ummm emadu migi loufamda thabak shuba chatkhi jatlo natraga migi yumgi thabaka shukhiba jatlo eibu kaida thiruduino. Chafu ashidasu chaksu amata yaode. Humm fare eine ema ngaiba oina ngasai ojana takpirakhiba parashing adu oirairaga oina leirage.”

Ashi khanduna mangolda fak ama tharaga ngasai mahaki ojana takpirakhiba parashing adu oiraiduna leirami. Ngaihaki matungdadi sanareisu mayumda halaklami. Mahakna macha nupabu ubada tapna hairake “heima echa halakledana ebungo nangbu wadabro ngaihaktangsu pothaduna leiramo yadro nangbu.”

“Ema eidi halakpa khara kuire adu emasu leiramde chaksu lambana loire ema. Eina chafuda hangdoktuna yenglubasu chakti amata leiramde. Adudagi eisu ema halakpa ngaiba oina ngasai ojana takpirakhiba parashing adu shum oirairambani. Adu ema ei chak yamna lame chak khita thongbigera.”

“ Hoi hoi emane thongbirage lakohhh adugane nabuktu penna chararo.”

Ashi haiduna mama macha ani adu emungda changkhre . Mashidagi thouyangbana mamada amuk hairake “adu ema nang ngasidi kanagida thabak shuruino.”

“Ahh ngasidine ema ahh awang leikai nadomcha hongbi hoigi lou pengba chatlubani.”

“Ashh ema nungshanaga kanbane emadi wabana loiramlani. Adu ema hayeng eina chaoragane emagi awatpa amata leihanloideine. Emabune nachana yamna nungaina thamduini.”

“Um umm adunane nangsu madu pumnamak adu ngamnaba haina yamna kanna hotnagadamniko. Ngaoshin feijinaba yadeko ebungo yengo emana houjik wariba ashe nangidamaktani mashi khangna nangna chatkadabani ebungo. Houjik naha oiringei wahouba kanna hotnahouba ashinane hayeng tungi punshida nungaina hingba ngamduine. Adunane houjik nungaithoklaga hingkhiba mioishing ashina makhoigi tungi punshidadi awabatana maiyoknadourine. Aduna nangdi houjik kanna hotnaduna wathokhouraga hayeng tungda yamna nungaina hingnaba hotnagadabaniko.”

“Hoi ema ei emana haibiba wafam amata kaojadiye ei yamna kanna hotnaganiye ema.”

Mathangi numitni thouyangba ayuk nganna houduna mamagi mateng pangshinba oina emungi thabak engkhang kaya amasu toushinlami. Aduga mahakisu mahei tamba chatkadabagi matam oiraktuna eru maithajathoklaga magi leijaba mafi adu nanna setchinlami. Aduga mama sanareinasu machabu pijakhinaba haina chak thongbirami. Mashidagi thouyangbasu chak adu chaba loiraduna mahei tamba chatnaba haina chenkhige tourami. Matam aduda sanareina machabu khamduna hairake “heima ebungo ngaikhonehei nangbu emana manamga nambihoudri adugane lainingthousu khurumkhowo.”

“Ashh ema eidi hekta kaothoklure emanadi tatana haibibane adu eina hek kaothokhiba.”

“Lakohh lakohh changlakho lakho kadai nakhut adu pirakohh ema manam nambige. Shee she lakohh lainingthoudasu khurumkho emaga .”

Thouyangbasu mamana hairiba adumak loina tourami. Mashidagi sanareina amuk hairake “ebungo nangshe thabak chathoklamdaida lainingthou khurumjaba aduga emana manam nambiba ashe matungdadi kaoba yadeko.”

“Hoi ema ei matungdadi kaodanaba tourage adu ema keigino emana eina yumdagi shanaba chatpabu oiro mahei tamba chatpabu oiro chatlamdai khudingi manam adum nambiriba aduga lainingthoudasu adum khurumhanlishibu keigino ema.”

“Umm ema haigeshe nangdine houjik angang oiribanina mashi pumnamak ashe khangdribani. Huren nangnane chathokhiba matamda lai tin fatababu oiro echada khurou amata thangba ngamdanaba aduga echana touru touruba thabakta mai paknaba aduga ashoi angamsu yaodanaba haina touribani.”

“Ohh adudi ema ei ngasidagi hairiba thabak ani ashe shukao kaoraroi. Adu ema ei amuk chatlukhigeko.”

“Hoi hoi chatluro chatluro.”

“Adu ema huren eina halakpada chara wanaba chak khakpiramuko eido halakpadadi waga wabane chakto yamna lameba.”

“Hoi hoi emanane shoidana echagi chak mayam ama khaklamge.”

Mashidagi thouyangbasu thunamak chenduna chatkhre. Mahakna hek chatkhibaga sanarei adu wakhal yamna nungaitana machana chatkhiba adubu yenglaga matomda mapi era chenduna haijarake “emagi ebungo nangnadi nangidamak chak khakpiramo hairi adubu houjik faoba nangbu chak ashe nabuk thanboi thandaboi pijakhrabani aduga emungda chaksu amata leihoudre. Aduga thongnaba chenshu leitri ngasidi migi loufam ayambasu thabak loina loinarabani emana shunaba thabaksu amata leiraroi. Hahh hurendi echabu kadaidagi chengna chak ashi pijagani.”

Ashi haiduna mamitagi mapi adu teithokcharami. Adubu mahak wakhal ama laktuna thinthaba toudana mayumdagi thoraklami. Aduga makhoigi leikai aduda leiba enak khunba emungda changduna mahakna shuba yaba thabaka leibara haina hangjarami. Adubu numit adudadi sanareina shunaba thabak amatasu fanglamde . Aduna mahak lambigi machi amada famthaduna wakhal adu yamna nungaitana leirami . Matam ashida sanareina magi wakhalda karigumba ama ningshinglaktuna thunamak magi mayumgi nakanda leiba engkhol aduda laklami. Aduga mafam aduda houba heinou panbi aduda palliba amunba heinoushing adu loinamak hektharami. Aduga madubu polang amada haplaga keithelda yonba chatkhre. Ashumna nungthingi matam oiraklabada thouyangba adusu mahaki mahei tamfam shang adudagi mayumda halaklami. Adubu mahakna mayumda halakpa matamdadi ngsisu mama sanarei adu mayumda leiramdre. Matou aduda thouyangbana mathamoida matomda khanjarami “ashh eikhoi emashe ngasisu amuk migi loufamda thabak shuduna leiramlani. Eina chak khita thambiramo hairamba adusu konadra malle amata thambiramdre. Ashh eishe ngasaisu chakshe puk thandana adumak chatlabani humm eikhoi emadu ngasidi khara nganna yumda halakladi fanida.”

Ashi khanduna mamabu ngaijarami adubu ngasidi fana thengnlaba faoba sanareidi halaklamde. Maram ashidagi thouyangba adu makhoi leikaigi khunalak warakta chatuna mamabu thiba houraklami. Adubu mahakna fangba koubadi leikhidre. Konnathangdadi mahaksu ashum mamabu thiduna lakpada keithel youshinlaklami. Aduga laibakna thiribasu mahakna keithel aduda hek yourakpa matamdadi atiyadagi nongsu arep apan leitana kanna heitharaklami. Keithel aduda tinlamliba miyam adu magi magi thokpa mayumda chenakhiba yao aduga mafam anakpa potfamshingda thuptuna leinaba yao tounarami. Aduga pikliba thouyangbasu miyamna nong thupnariba adumaina machi amada thupnaba haina mafam chaba ama koiyeng yengba houraklami. Matam ashida kalaba nongi marak aduda apikpa fi macha amana masha adu thungboi thungdaboi khanduna polang amada heinou amunba kharabu haplaga nonglakta koichen chenliba mioishing adugi matungda ennaduna magi heinou adubu leibiyo leibiyo haina hairibi mamagi shaktam adubu mahakna uraklami. Oiramliba mamagi fibam aduga pikliba thouyangbagi thamoi adudi pungkai kaikhre. Nong churakpagi miyamnadi machi marumda thupnaba hotnari aduga sanareidi machabu huren mabuk thanna chak pijanaba haiduna nong marak aduda magi ennafi macha adumana kuplaga machi machida nong thuptuna leiriba mioishingi manakta chang changdu magi heinou adubu yonaba hotnari. Thouyangba mamagi matou adu ubada nong thupkani haiba faoba kaokhre mamabu yengjaraga mamitagisu mapi aroi akham leitana shintharakli aduga nonglak aduda tapna mamagi manakta changshinduna mamagi makhut adubu tapna paijaraga hairake “ema keino nangna touramliba matou ashibu nachabu puk thanna pijanaba hotnabada ashigi fibam ashi youna emana hotnaramgani haibadi eina mangda faoba mangludabani. Ema nangbu eigi ema oina fangjaba ashe kayada leibak faribano eishe.”

Sanareisu mamitagi mapi tana machabu mathada konshinjaduna hairake “emagi ebungo karigi nangna kaplibano nangidamak nama ei leirishidi kapkanu tokloshe emadi karisu wadiye.”

Ashum touna numit adu houkhre aduga thouyangbasu hanadagi houjikna amukta henna mahaki mathouda pukning changshinba henlaklami. Aduga matou ashum touna hotnajarakpa aduna houjikti thouyangba adu pakhang mapung fare aduga mahak houjikti shenjao paiba karbar wala amasu oijare. Maram ashidagi wajaraklabi mamabu mahakna nungaina thamba houraklami. Nongmagi numitni thouyangba mahaki thabak chathokluraga hanjinlakpani . Matam aduda sanareina makhoigi yumgi nakanda leiba engkhol macha aduda mana mashing khara thagadabagi touduna leiramba adu mahakna uraklami. Madu ubada thouyangbana mamagi manakta changshinduna hairake “ ehh ema keino toubiridubu emungda tumina tumdana hiptana nungaina leithokuhh yadro. Engkhol ashimabusu amuk touthoklamlishina keigino nate keidouge hainoba ema.”

“ Ahh eshase kari amata shudana shum leiba adu nungaite haina engkhol macha ashida mana mashing khara shum thajinge haina tourambani. Emungi thabak khara touraga emadi karisu touningai leitabaniba adum pothaduda leiredo. Aduna hakchangshe erum lumtharakpa douba touwine adunane shajen oi keioi emana touramline.”

“ Ashh eikhoi emashidiba ema hanaa naha oiringeideisu shuba yaba shurakle waba yabasu warake. Houjikti nachana emabu nungaina thambagi matam adu amuk oiraklabani aduna matam amada emana nacha eigidamak hotnarakhiba mayam adu nachana emabusu amuk houjikti nungaina thamladuine. Adu emana engkhol ashe hanghanningdabagi mana mashing thashi hairasu karisu kaibadi leite. Aduga ema emagi hounabi thabakta laining oiraga adum touraga leibadudi toubinuko. Shhee kadaino yotpaktu purakohh ei engkhol ashe touraklage aduga emana mana mashing adu thajinbirakohh.”

“ Haii yaraninehei engkhol macha ashimabu toubagibu ema adum touge shhe shhe karaino yotu pirakohh . Nangne thabak halakpagisu waramlani ngaihaktang potharusho chatlo.”

“Ema ei keisu wadeba keidabu waningaibu leige. Thabak chatlishe eina thabak adubu shurubasu nate mi mayam ama neklaga shuhanlini aduga eina makhoibu yengshinba khaktani nate mashidabu karida waningai leige. Kanadese ema mana mashing shing adu thaba houjinlakohh.”

“Mashigi angangshidi hoi hoi ema thaba houraklageko. Adu ebungo emana nangonda hainingba wafam amadi leiko . Madudine atei karisu nate nangnane houjik shenjao paiba achouba enak khunba mioi ama oire haidunane nangna lairaba shinmishingbu hanthana khanba yadeko. Matam amada ema echana kayada wakhiba adu nangna ningshingduna yariba makhei thabak shuriba mayam adugi mabuk pennaba thabak adu nangna tougadabaniko. Hahh makhoisu lairaningbadi natene upai ama leitraduna lairaribani. Matam amada emana nangbu nabuk thanaba pijannaba hotnaba matamda kana amatana cheng khuya ama faoba lemna pibirakhide. Adubu ema echadi makhoigi matou adu tamgumshi eikhoina hek leijabi hotnaduna awa ana taraba mioishingi mateng pangadabaniko.”

“Hoi ema nachane emana haibiba wafamshing adu amata kaojadiye ema aduga einasu thabak oina loina pangthokaduini.”

Matam khara houkhre nongmagi numitni thouyangba mamagi manakta tapna changlaktuna ashumna hairake “ahh ahhh ema ahh .”

“Haii keinone ahh ahhh touraga leidubu keino haiyudana.”

“Keinone ema umm nachana ngasi haiduishe nachabu yamna ekai khangde hainasu khanbiganuko ema.”

“Ehe ebungo keino hekta haiyu keidouge nangbu. Karigi echabu emana ekai khangde haina khanduino emagidi echa khaktani aduna wafam khudingmak emada arotpa leitana loina haigadamni.”

“Ema nachana kanagumbi amabu yamna nungshijarure aduga manasu eibudi yamna nungshijabani. Adu ema nachanadi nupi adu eigi nupi oina loujanige aduna emana eigidi ema epa animak oibibanina nupi adubu amukta haiba chatpiyo ema.”

“Hahh kari haiba echabu nupi amaga khangnare haiba. Ohh matam ashe houkhiba khanghoudedako emadi nahak ashe eigi mita ngarangtagi pishak pikliba angang adu oina uri. Adugadi echa ashe yumban matam adu chap chaduna leiramle. Adu ngaikhone eigi emou adubu mashak matou adu kamdouge aduga mamingna kari kouba .”

“Ema mashak matoubudi yamna fajeiye hayeng emana hek ubada emanasu khoijabi namou haidu oiraduine. Adu mamingbudi maipakpi kouwe ema. Ahh eikhoigi thangnaba khunda leiba masha mauhhga yamna wang chaoba pukchao hairiba nupa adugi macha nupi atombine ema.”

“Ohh ohh tada pukchaogi macha nupi oireko haii adudi magi mama mapa adudi miyamgi houna lonchatsu yamna khangbanine aduna macha adusu yamna faramganibo. Ahh fare fare nakhoi nasha nashasu hanadagi khangnajare hairabanina emnane hayengla hangchitla afaba numit ama yenglaga emoubu haiba adu chatlage.”

Ashumna mathangi numita leikaigi ahal kharaga loinaduna maipakpibu haiba chatlami. Maipakpigi ahal lamanshingnasu wafam adubu haraona yaraktuna houjikti thouyangbaga luhongbagi matamsu lepnakhre. Nongma sanareina keithelda potchei khara leiba chatlami. Matam aduda mahaka punna thabak hek hek shuminarambi potcheigasu yonminarambi nupi amaga thengnarami. Matam kuina thengnarudrabagi tungda thengnaba aduda makhoi ani ngaihaksu wari watai shanarami “ heima sanarei nangdi nachana shenjao paiba ama oikhrabanina yamna nungaina hingkhreko. Hahh eikhoidine ewana marol ama oktabani echana marol ama ngaoshinabane houjik fao shigi fibam ashidagi karisu fagatpa toudri. Punshishe shumaina ashum wana wana loikhradaba malle.”

“ Hahh mibu ashum waraga leiba yabro nangsu shoidana nungairakhini adumna wakhal adu hanthagano . Matam amada eisu nongju nongsha khaktaba kayam wana hotnakhi aduga houjikti yengo khara shafaraklishini. Aduna nangsu akhang kanbi ama oiyo aduga nangisu nungaiba matam amadi eshorna pibirakaniye.”

“ Hoishe adu shina shi oikhrasu nate nangbu kari leiba laklinoba.”

“ Hoo echa nupado luhongdoure aduna potchei khara aduk leiba lakpani.”

“ Ohh ohh adu nupidi kaidei eikhoi shwaidei nupiroba.”

“ Hera nupibudi noi leikaigi ta pukchaogi macha nupi atonbi aduni.”

“ Heima maipakpi aduro hairishibu.”

“ Hoi hoi mane mane .”

“ Ohh adudi yamna faba angangni mama mapa adusu houna lotchat yamna khangbani . Adu moigi macha nupi ahalga yaimagadudi mama mapagi mawong matou machet amafou loudabani aduna chanadaduna mapamda halaklaga leibani. Adu maipakpibudi adum fana uida eikhoina ubadadi adu madumak oidunasu mi haiba ashe tamba ngamba nateko adunane nangsu namou adubu hayeng laklaba kanda nacha nupa ashibu nangondagi munkhidanaba touko. Hahh eisune eina wana yokcharakpa eigi nungshiraba echa adu magi magi nupigi loina oikhre. Houjikangi nupishing ashe thaina eikhoigi matamgasu yamna manadrene sanarei . Houjiki mou ashidi emung pugani khangdedo aduga manem makugi shebasu touni khangde. Makhoidi nungaibatane pamlishe eikhoibu kari amata faoba pijaningpote. Aduna makhoina shuraga nungaina hingdou matam ashida moinasu amuk enthokpiramnina eisu epum thitpa makhei houjiksu warishine .”

“ Keino haishibu memcha houjikangi moushingsi adumaina loina tounabro.”

“ Hooo tounabani tounabani nangbu leikai leikaida thokliba mani mamougi warishing ashi amata tadrabo . Adunane eibu haijou hairadi nangne namou laklena haraojaruno karigumba namou aduna faramladi fei adu nataduna hogai thingaibi oiramladi nangne eigi fibamm ashe taduini. Aduga houjik ema ema haina nangita khaliba nacha nupa adusu luhonglaba matungdagidi magi nupina haibada yakhraduini. Hahh moi mou nahashingshe maheigasu touraga mawa mapuroibashe fabigasu touna malle. Madunane moi moigi nupashing aduna moina haiba yariba adu.”

“ Ohhh aduna oiba taine houjikangi emungshing ashina shanti amata fangdrishe. Hahh hayeng eigina karam thoklagabano.”

“ Sanarei eigi wadine nangne panganu namouna nangbu kina hangoina chathanlo. Nangna mabu nungshirabasu nangi nungshiba adu uthokanu manungda adum nungshiyo. Aduga mapandana moina khongthang adu henjina thanglaktanaba thabak adu nangna tou .”

“ Umm nangna hairidu afaba oidou malle.”

“ Umm oiduine oiduine aduga yengo nangidi nachasu ani shuba natedo aduna nacha thouyangbabu namou nupi aduna khudum chetna paishinkhradi nangidi hayeng kanada changjagani adunane nashana houjiktei houna wakhaldu yammna munna khaloko.”

Ngasai memchana hairakliba wafam ashidagi sanarei adu magi wakhalda macha nupa thouyangbabu mamou nupina fajinkhidra khanbada mahak yamna pakhatcharami . Mahaki amata ngairaba lan oijariba macha nupana adumna toukhradi mahakti kamdouhouni. Hairiba wakhal mayam ashina haraona leijaramba sanarei wakhal adu mamou lakani haibagi karisu nungaikhidre madugi mahuta henna mipaiba henlaklami. Magi charangnaba matou aduga maithongda tariba mami adu thouyangbanasu urami . Aduna tapna mamagi manakta famthaduna hairake “ema keidourage ngasidi wakhaldu enung nungaitaba douna urishibo nashaga nungaitrabo ema.”

“ Humm ema keisu toudeda ngasaine nungsha marak aduda chatlubagi kok ashe khara chikpagi wani. Adu ebungo emane nangonda wahang amadi hange. Hayeng emou ebema aduna yum ashida laklaba kanda nang eibu miraigadro.”

“ Ema kari wahangno adubu einadi keigi emabu miraiduino. Emasu nungshi aduga maipakpisu nungshi nakhoi animak eigi efamdadi yamna maru oiba mishak ngaktani . Aduga nakhoi anigi nungshiba adusu tongan tonganli ema nungshibana ama etu echa nungashibana ema . Aduga eimanadi nachabu ashuk wana paba yaodana ema khaktana naiyok naikonbirakpagi laman adu shingba loijadri. Madugi laman adu handak mapokta natana mapok mapok khudingda nachana shingba ngamlaroidabani. Apokpi ema nangbu miraiba ngamgadaba machadi mapaptana mapot faraba mishak haidu oiduini. Aduga ema nachagi punshi ashidi emagidamakta hinglibani. Aduna eina emabu keidounungda mirairoiye. Adu keigino ema nangna ngasi ashigumba wahang ashe hanglishibu.”

“ Humm keisu toudeda houjikangi moushing ashina mayumda tounariba lonchat mayam ashe ubada emana pakhatana shum hangbani. Engna chikna harao tayambana thalaba emung adu oihaninge. Madu oinaba nangnasu hotnouko ebungo.”

Matou ashum touna houjikti thouyangba amadi maipakpi ani adusu leibak miyam changduna yamna chaona luhongkhre. Luhonglaba matungda maipakpishu adumak faba nupi oibana mangondasu fataba wakhal amata chenlamde. Manembu yamna nungshina amadi mahakpu hek pokpiba mama makni haina khanjarami. Aduga mapuroibabusu mahaki mitna uba eshorni haina khanjaduna makhoi anigi sheba ningthina toujarami. Maipakpigi ashigumba matou ashida sanareisu yamna penjarami aduga mahaknasu maipakpibu mana hek pokchaba macha nupini haina khanjaduna ashuki matik lunna toubirami. Nongmata emungi thabak engkhang toubada mamoubu loutunabasu touramde. Aduga maipakpinasu manembu thabak shuhandanaba kanna hotnajei. Manemna thabak amabu hek touramba thengnarabadi mana oina hekta changshinduna toujei. Ashumna matam kharadi emung adu yamna engna chikna amadi nungaina panlami. Nongmagi numitni maipakpigi mama adu masha yamna kanna ngamdre haina pao ama chenlaklami. Matam adumakti thouyangbasu magi karbar adugi atopa leibakta chathokhiba oibana mayumdasu leiramde. Aduna sanareina mamou nupida hairake “haii ebema nangi ema adu mashasu yamna kanna ngamde hairabanina nangbu amukta hangba adu chatlushodana. Ebungodi yumda leite aduna nangna ebungo yaodrasu chatlaga namagi sheba adu toubirusho adugane nongna ninisu hek leithokesu leithorakohh adu oiradi namanasu mathwai adu khara nungaijanaba.”

“ ema chatpabudi chatninge aduda tamosu yumda leitabanina ema nathanda thanamba adu ei ngamloiye adune hayeng konna tamo halaklaga oina chatlage.”

“Haii angaobishide emagidi karisu khanganune ema karisu touroi . Ana ayek haishidine thinthadana hekta chatkadabani maduda nangi tamo amuk ngai leiradi kamdouni. Hayeng hangchit halaklani haibasu khangdriba mi adubu ngaiduna leiba hounade. Adunane emana hairishini nangne ngasimak keitheldei kari karino namana chaba yaba khara leiragane amukta chatlusho. Nama adunane nakhoi nakhoibu chaonaba yokcharakpada yamna wajaraklamduine adunane apokpa apikpibu miraiba khak hounadeko ebema.”

Sanareina ashumna fajana hairaba adudadi maipakpisu houjikti mayumda mamagi chana thaknaba mayam ama leiduna mamagi anaba adubu hangba laklami. Mahakna lakpa adu ubada mache ani amadi mapabungna haraona koushinduna mamagi manakta puna changminarake. Mashisagi pukchaona magi nupida hairake “haii mama yengo yengo kanano laklishe nangna nacha nupi atonbi ashitabu shonjaba adu houjikti lakletu.”

“Hahh kadai echa tombibu lakle haiba ahh ebema emagi maipakpi lakohh emagi nakta changlakohh.”

“Ema nacha shida leiye keigi emana kuina naba yage houjikti ei laklabanina naba adu thuna faroko ema.”

“Umm umm farduini faraduini.”

“Ahh echasa epani ngasidi nga achouba amata leiruge echa nupi atombi lakpagine eikhoi punna chaminashi.”

Ashi haiduna pukchao adu keithelda chatkhre. Mashida maipakpigi mache ahal aduna amuk hairake “adu maipakpi nangbu ebunngo thouyangbana luna chana adum toubiba natro.”

“Hoi echechoubi mana eibu yamna luna toubiye aduga moi emanasu eibu mahaki apokpi machada machadouna yamna nungshina lunna toubi.”

“Umm adumnabu touradi feiye adu ngaikho nate nangbu nayang adu ekang kangshinbagum touwi nate nangbu ahhda emungi thabak adu natomdana adum touragada leirabro tourishibu .”

“Echechoubu yumda mou oina leirishe ei ethantane aduna eina loina toudradi kanadabu touhanluduino kanabu amuk ngairuduino. Madudi mou ama oibagi mathouni ema adunabudi eigi eteng pangba oina thabak adu khara kharadi adum toushinlakee adu einadi eina oina touge haina emabu thabak amata touhandabani.”

“Ebema nate nangshibu panglibro natragana shinglibra haiba houjik nangi nanem aduna nangbu lunaga toushineibu fajinaribani. Madine moithem touraga nangi nupa adubu nangna khudum chanshinba ngamdanaba haina toushineine. Yengo yengo hayeng chahi ani ahumga shujinlaklaba kanda nangbu kayam thina tourakani. Nangna adumaina kina chatpa taradi manasu adum nangi nathakta karaktuna netlaba tabani. Matam aduda nangnasu keisu touba ngamloi. Aduga nangi nupa adunasu mamagi michangda oina leplakani. Matam aduda nang kari tougadouriba makhoi yumgi minai haidi adum oiba tabani. Adunane echena haigadabadine nouringei nawa napuroibana nangbu nungshina luna khanlingei nangi nupa adubu khudum chetna nangna paishinaba hotnahougadabani. Adumna hek touba ngamlaba nangna touningbada touba adum yare. Nanem adu nangi nakhada thamgesu yare nangna luna tougesu yare. Aduna houjiktagi houna nanem adu nangna namthanaba touhou . Madu natrabadine nangne hayeng eikhoina leiriba ashumaina adum leibadi shoiraroidabani.”

“Echechoubi keino hairishibu ashengbeiro eibu adumaina moina thinaga tourakadro.”

“Haii tourakduinine thina tourakpa khakta natana nangbusu moina nungshiraktradi hatnaba faoba tourakduini. Matam adu eikhoidi thapna leibani eikhoina nangbu kanba ngamgaduira .”

“Yengo ebema nache anina hairishe achumbasu achumbani nangsu ka hennane nanema adubu nawanghanganu. Mashu ahal pangoi oibamaksu natri aduna thabaktu mabusu khara shuhanlo.”

Ashumna mama amadi mache anina enshinlakpa mayam aduna houjikti maipakpigi wakhal adu pungon onkhre. Aduna mahakna mayumda halaklaba kandadi maipakpi hanadagi yamna hongkhirami. Ayuk nganna nganna hougatlamba mana thengna thengna manem sanareina thabak engkhang amadi chak faoba thongba loiba ngairaduna hougatlaklami. Adubu sanarei mamouda karisu nungaitaba aduga wakhal lanna khanbasu toude . Mashu mana ngamiba makhei mamouda loutanba toudana emungi thabak adu toujei. Nongmagi numitni sanareina chak thongba loiraduna mani mamou ani adu chak chaminari. Adubu maipakpi manemna thongba chak adu hek charubadagi mapanda chenthoktuna mana chakhiba chak adu loinamak othokhirami. Matou adu sanareinadi karisu khangjaba natchade madi hanagi matougum mamou nupi adu chak mabuk thanladuna makhut hamba chatkhrini haina khanjarami. Adubu maipakpinadi ngasi tourakliba matou aduda manemna mabu nungahidabadagi huu haptuna hatnaba hotnare haina khanjarami . Aduna emungda saona changlaktuna sanareida cheiba houraklami “hee hingchabi mi fatabi keigino nangna eibu hatnaba hotnarishe. Nathibong adu eikhoina thakline emungi thabak khara nangna touba ashiida nangdi eibu yamna nungshidriba oireko. Nang houjik nakhouri charam adu metkhaiduna hatokuhhro hahh.”

“Hee kanadano nangna nganglido adugumba warak wayel thungdaba wangang shangang adu nangi nama napa aduna ngango haina tambirakpro. Nathibong adu nabuk pik thanachabadagi chandaduna ohhraga nangna eingonda a tainei keigino. Chak enshang ashe nang natomda chaba nate eisu charini eina keisu touraga nangna hekta touba yabro. Nangshibu karamba mounone ebema. Nahan makheidi echani emouniko khanduna eishe karisu khanludabani aduga nangna ngasi nagnglakliba wangang shangang adudi karino. Nangbu nongmata ayuk nganna houraga emungi thabak touni khangbro nathibong chanaba chak ashi faoba thongni khangbro hahh . Humm aduga nathibong adu tap tana chaba loire haiduna nangbu kari thabak youramge. Nakhut adu chop laona haplaga adum chatkhre. Adu faoba eina ngasifao nangbu kari amata haibidaba nineheii.”

Ashumna mani mamou ani adu ngasidi aroibida yamna kana khatanarami. Matang ashida thouyangbasu mayumda halakpa mapa chanakhiduna mamaga magi nupigana khatnariba pumba tare. Mahaknadi makhoi ani ashe yamna nungshi chanana leiminaramni khanbani. Adubu ngasi oiramliba matou ashida thouyangba makhoi anigi marakta changshinduna hairake “keino ema maipakpi nakhoi anina touramlishee hahh.”

“Madu eingonda hangano nangi nama ashida hango mana eibu chakta huu haplaga hatnaba hotneine . Nangsu nama ashi nungshiradi namaga leiminahouro. Eibu yum ashigi minairo emungi thabak pumba eina shum touraga leigadro.”

“Hee nangonda emungi thabak touwi toudena eina nongmata nangonda ngang cheibro. Aduga nathibong adu laobagi ohjaraga eingonda huu hapchile gaidi keino. Nangsu nama napana warak wayel thungadaba machanine aduna ahal lamanda karamba wangang shangang nganganisu khangdaba. Nache ani adusu nangdouna touramniye adunane chana wainadaduna halaklaga leiridu.”

Ashumna mana mana thokna pangangda nagngnaduna ani adu yamna kanna khatnarami. Aduga thouyangbana khamba yaba khamlabasu makhoi anidi magi wadu tabiba kouba leiramde. Maram ashidagi thouyangba adu mayum thadoktuna yamna saona chatkhirami. Sanarei amadi maipakpishu thouyangbabu khamnaba kanna hotnarami. Adubu ahingi amamba matamga oibaga mafam marang amada khangnakhidre. Mashidagi sanareinasu kap kaptuna mamou nupida cheiraklami “hee hogai thingaibi nangna maram oiraga ngasidi echa ashe yum thadoktuna chatkhre shi natro nangna pamlishe hahh. Nangdi oktabi ama oinaba nashana shinjariba oirini nayum adu nupa amada amuk palabasu naha oiribanina yakhini khalaga nangna khudingmak shinliba natro.”

Aduga maipakpisu kap kaptuna manemda oina onshinduna maral kaya ama shirami. Ashumna numit adumadi houkhre. Mathangi numitni sanarei amadi maipakpi magi magi thokpa mafi loishinaduna thouyangbabu thiba chatnaba haina shem shaduna leirami. Matam adud maipakpi adu leplambadagi makok adu kanna ngaoraktuna mahak leimaida gyan mangduna takhi. Sanarei yamna pakhatna mamou nupibu ngamboi nagmdaboi thang thangduna emungda pushinlakle. Aduga eshing thabiduna mamoubu wakhal taraknaba haina kanna hotnajei. Maipakpisu ngaihak leibagadi wakhal taraklami. Mashidagi sanareina wakhal ama khalaktuna maipakpida hairake “ebema ema wa haige nangna ngarang emada huu hapchinli haina hairiba adu eina nangonda karigibu huu hapchinduino nungshiraba echana lourakpa emoubu eina karigi nungshiroi. Nahak ashe mama oidoure aduna nagondda nashada nungaitaba kaya ashe fourakline. Shee shee hougatloshe ningthina famo mama ama oigadourabagi khudam changdam kayani nangonda touraklishe. Hahh adugane ebema ema ngasidi wa khara haigeko nangonda nangna handak marak nangi nawong natouda ahongba kaya ama tourakle haibasu eina khangi. Adubu madu emana karisu nungaitaba toude. Adubu nangna ngarang ngangliba wangang shangang adudi ema khara pendeko. Emanane thouyangba ashe yoknaba hotnarakpada kayamuk yamna warakhi haibasu nangdi khanglamlaroi.”

Ashi haiduna macha nupaga makhoi anina yamna wana hingnabagi lanfamda lanthenganrakhiba wari adu liduna khanghanlami. Aduga wari adu tarubadagi maipakpisu mahakna toururiba thabak adu lanle haiba khanglaktuna sanareida mahakpu ngakpinaba haina haijarami. Aduga manemgi makhong shoktunashu khurumjarami. Manemasu mabu nungshina hougatpiduna konbirami. Matam ashida thouyangba adusu haraona changlaktuna hairake “ ema nakhoi anina wakhal taraktuna nunshina loinaba matou ashi ubada ei yam pelle. Eigi oinadi nakhoi animak eigi punshi ashigi oina yamna maru oiba mishak ngaktani . Nakhoi anina haraona nungshi chanana leiba uraga einasu penjaribani.”

“Heima ebungo nangbu ngarang saoraga chatkhiba daine emou ebanisu nangbu thiba chatke touramline. Nate nangbu kaida leiruge.”

Read this also: –Dolai Apaibi

“Ema ei keisu chate ngarang noi anina khatanba adyda saoningduna nakhoi anibu wahange khalaga eina lotpani eidi eikhoi mamang shangoigi kei manung ashida lotlaga leiye.”

Wahei adu tabada maipakpi amadi sanareisu yamna kanna nokthoraklami. Matou ashumna numit adudagi houna makhoigi emung adu nungaina pankhi. Aduga maipakpishu makha tana mama amadi machem anina enshinba wasu loukhidre hanagi matougum yamna afabi mou haidu oiduna makhoigi emung adu engna chikna pankhirami.