Mamang ngeigi matam amada phou panbishingna maning tamna shatpa khun amakhak leirammi.
Phou panbishingna nungshitki epomga loinana jagoi khuthek tamli.
Yengbada pukning huna phajei mashibu ukhiba mipum khudingmakna mitpham hongba ngamlamde.
Phajaraba phou charongshing ashibu mapuna ujabada momon minok noktuna thamoi penna haraojei.
Khunjashingna phou mana mashing thajaba ashina makhoigidi maruni chahi chuppa makhoina thajariba phou mana mashing ashi charaga hingjaribani.
Khun ashi mina pak changnaba ngamdaba lapkharaba chingnung amada khundaduna leirammi.
Mapham ashida leiriba khunjashing yamna heishingba shatanbagi lamda thoidok hendokna khang heiraba mi ngakta khundaduna leirammi.
Khunja punna shatanba amadi lou uba punnamak houraga chatminaba ashina makhoigi chatnabini.
Mapham ashida yamna shathiba sha kaya amashu leirammi adubu khun ashigi mioi amatada shathikharaba shashing ashina henjinba ngamlamde.
Ashina keijao kaya amashu makhoigi manaktagi lapna chattuna leinakhi.
Nongma khunja nupashingna punna louphamda chatlammi.
Makhoigi marak ashida shanatomba kouba nupa amashu yaorammi.
Shanatombagi nupi amadi macha ahumshu leirammi shanatomba mabuk mapaodi yamna phei adubu nupi mashak phajaba uba yadaba nupida choppa nupa amadi oirammi.
Shanatomba matao mayamga punna loushuba lakminnarammi makhoi mayam wari nungngaiba kaya shanaduna laklammi.Eshei shaknaba wari shanaba kaya touduna yamna haraona makhoi makhoigi louphamda laknarammi.
Shanatomba ngashidi wakhal yamna nungngaina lakcharammi.
Mataoshingdi masha mashagi loupham youduna leinahoure magi louphamna mayamdagi khara shangna chatlammi.
Monda yamna nungngaina louphamda changlakpa matamda magi phou panbishing adu loina neihattuna leirammi.
Matou adu ubada karamba shana touribano khanduna leirammi.
Shanatomba yamna shaona machinda shonjarammi,
“Mashibu mina touribara shana touramlibara eina ashuk kuinadagi shennajarakpa phoupambi mayam ashibu loina neihattuna thamlamle.
Lokkadubagi matam youshinlaklaba ashida karino eina tougadaba ashibu.
Phei khanggani eigi phou panbishingbu neihatliba shara mira hekta khangdoklage.”

Shanatomba numit adu mayumda handaba makhei louphamgi manakta houba ujao aduda kakhattuna phamlaga yengduna leirammi.

“Eina ngashaidagi u mathak ashida phamduna yenglibashi kana amatabu lakpa ude eina u mathak ashida leibashi khangkharaba jatla.Matamdi phana yamna thengjinlakle Nongnganba phaobadadi shangduna leirage.”

Shanatombana nongnganba phaoba shanglammi adubu mana shangli ngei matamda shashu mishu amata lakpa uramde.
Ashigumba matou ashida magi wakhal yamna chamamnarammi adubu kana amatana toudana phou panbishing ashi loina manghanlamgadaba natte kanagumba kharana tourambagini haina khanjarammi.
Mayumda handuna potharurage khanlammi.
Lemhouriba loupham aduda shangban ningthina khajinduna thamlamlaga mayumda hankhi.
Shanatomba mataoshingda wari lijarammi,
“Etao eigi lou pham kharadi neihaktuna thambiramle loupham aduda thaba phou amata lokpa yararoi.”

“Etao madudi kanana touramliba.”

“Khangde eishu ngarang nungdangdagi loupham aduda lektuna khangdoknaba toubani adubu kana amata lakpa thengnade.
Ei matha yamna share etao chahi chupa chagadaba phou mayamdu loina manghanbiramle.”

“Etao phou mayam adubu manghanlibadu umanggi sha gumbanashu oiramba yai aduna eikhoi punna chattuna amukta yengthokpana phagani nattrabadi eikhoigi louphamdashu youshinlaktuna khunja miyam punna awaba tarakpa yai.”

“Etao adugini eishu haiba lakebashi nungdang amada aduk yamba phou mayam adubu manghanba ngamba sha adu khara chaoramgadaba manli.”

“Phare etao amabu oire amabu oire eikhoi punna chattuna hekta phanaba tourashi.”

“Hoi etao aduna pharani.”

Makhoi mayam punna wa khannaraba matungda mayum mayumda hannaduna chak enshang yomduna puraga louphamda leknarammi.
Nganna chak chathoktuna louphamgi nakan nakanda lumnaduna leinarammi.
Phana thengjinlakla phaobada kanashu lakpa uramde.
Ashumna ngaihak leiraba matungda lamok khara laktuna phoushing adubu neithakpasu urammi.
Tanja aduda makhoi mayamna tana thinduna lamok adubu hatlammi.

Houjikti makhoi mayamgi awaba punnamak kokle lamok adubu mayumda puraktuna makhoi punna thongngaga chanarammi.
Shanatombagi nupi ebemcha yamna chamjabi nupini mapuroibagi wa mathakta nongmata ngangjaramde.
Shanatombana khungi mashak matou phajabi leishabi amabu urabadi mayumdaga hanjinni khangdaba makhei nupi adubu lumba chatlammi.
Magi ashigumba matou ashida khungi leishabi shingna yamna shaoninglammi.
“Ta shanatombana khanliba wakhal ashibu karino matu macha leiraba mana lemna leithokkedi haidradana khungi machan eikhoida aranba mityeng ama yenglibashi eikhoi yamna heinade.”

“Mana touriba maong matou ashibu enamma ebemchana kari amataga haidaba jatla khangde.”

“Kari amata hairamloi enamma ebemchadu mabuk yamna phabani magi mathouda touduna leiramgani
Shomdana tashanatombana nupida ngaoduna leiribashi madi amataga khanglamgaduba mande.”

Khungi leishabishingna wari kaya shanarammi.
Cheiningbana loirammi adubu ahanni khanduna karishu hairamde.
Nongma ebemchana phi shaduna leiri ngei shanatombana loubukta chatkhibagi matam adaida mamannabi khara lakammi.

“Ebemcha nang phi shaba loirabaro.”

“Eta loidarida nang phi louge haibaro.”

“Mina nangna shaba phishingshi yamna phajei hai aduna eishu echa nupigiga eigiga louge haina lakebani.Nangna sharamliba phi ashidi yamna phajei mashi mingondaga pithokkharanu ei oina lourage.”

“Hoi ado phishidi khara shaduba watli khara leiraga oina louro.”

“Hoi yaida houjik houjik shetnanaba natte nangna tapna tapna adum phajana touda yani.
Ado ebemcha nanggi nupadi ude kadaida chatkharage.”

“Loubukta napi khara shengba chatkhari.”

“O adudi phare eishi nangngonda wa amata hainingba kuiraklabani ngashidi matang chare.”

“Kari wano etana hainingliba adubu.”

“Ebemcha nang natabu yamnadi lanna louganu natana haigaduriba wa ashi etabu nungshibagini.
Eta nanggi nupadu khungi leishabishingda yamna karantai hai leishabi mashak phajabi urabadi koige haina koitan tannei hai mashibu nangbu khangdabaro.”

“Eta eishu khange adubu eta mashana wakhal tararoi haina tadrabada eigi upai leite eina phana yamna haijare adubu amata loubide eina yum ashida leiribashi echashinggi khanduna leiribani.”

Mamannabi aduga wari kaya shanajarammi.
Ebemcha wakhal yamna nungngaijaramde mapuroibana chahi lengga chadana macha leiraba mana migi leishabi machashingbu pamlibadu yamna yaninglamde.
Shanatombana louphamdagi hanjinlakpa matamda ebemchana hairammi,
“Tamo khungi leishabi nachanshing aduda aranba wakhal khanbagi matam loire tamoshi angan nattrabani mina thina ngangnabadu taba ngamlibara.”

“Ebemcha madu nanggi nathou natteko aduga miwa ngangnaningba makhei ngangnajashanu mawa amata loude.
Eishi naha yamna oiriba jatni nang loubadagi eishi kuina pakhang phabaga phajakhidabani aduna houjik ngaothoklibani.”

Ebemchana haibaga tade mana thokpa ama ngangduna chatkhi.
Ebemcha mapuroibagi maong matou ashi yamna yaninglamde mapamda chatkharashira haina khanlammi adubu machashing ashi mina pupang shudaba machani hainakhini khanduna leirammi.
Shanatomba mamannaba shingga ngaoba yaba ngaothoktuna leithoklammi.
Nongma makhoi punna loubukta chatpa matamda shanatombagi loupham aduda hannadagi henna phou panbishing adu yamna thina neihaktuna thamlamba thengnarammi.
Shanatomba shaobana meihourammi handakti kana amata houdana ma mathandana sha adubu phagani khanduna ta phajaba machin tumba ama paiduna nungthilgi matamdagi ujao adugi mathakta tongduna ngairaga leirammi.
Mana ashum ngaiduna leiri ngei khanghoudana umang adomdagi yamna chaoba lamok ama thoklaktuna magi phoushing adubu chabadu urammi.
Matou adu ubada magi ta aduna lamok aduda langlammi.
Adububu lamokna leithokkhiduna panlamde.
Lamok adu yamna thuna umang adomda chenshinkhi.
Ujao mathak adudagi yamna thuna kumtharaktuna lamok adubu tannarammi.
Mana phana kanna tannadunashu lamok adubu phaba hekta ngamlamde lamok aduna umanggi manungda ashum makha tanna chenshinkhi.
Shanatombashu tannaba lepte lamok adugi matung ennaduna tannarammi.
Lamok aduna umanggi mi kanashu leinadaba shuklaba mapham adomda ashum chenshinlammi ashum tannarakpa ashina lamok adu yum amada chenshinlammi.
Matam aduda shanatombana mashak matou phajarabi leishabi anina lamok adubu nanduna leiramba thengnarammi.
Leishabi macha aniduna mabu ubada pakhattuna emungda chenshinkhi.
Shanatomba leishabi anidugi marakta khawaidagi mashak matou phajarabi thadoibu yamna pamjarammi.
“Umang ashidabu ashuk yamna phajabi leishabi anishina kanaga leiminnariba sha keina thanlaba mapham ashidabu houjikkidubu henloiga haidu oiraba jatla.
Mashakti onthoknashu phajakhare mibu oire laibu oire eigi nupi oidaba yade.”

Ashumna khanduna leiri ngei leishabi anidugi mapa mapanda thoklaktuna mangonda hairake,
“Ebungngo nang mapham ashida keidouba lakpano.”

“Pabung nacha lamok amabu tannajarakpani ado houjikta changkhiba leishabi anidubu pabunggi echa nupi ngaktara.”

“Manni eigi echa nupi ahan ashina thadoi kouwe aduga atombi ashina laija kouwe.ado nangna thiba lakliba lamok adu eigini lamok aduna karitourambagino nangna mabu phanaba tannaraklibadi.”

“Pabunggi ok ashina eina thajaba phoushing loina neihattuna thambiramle ashina eina mabu phanaba tannajarakpani.”

“Nupa macha eigi okna nanggi phou neihatlambagi shel kaya piyu haibano.”

“Pabung nacha shel pamjade.”

“Adudi kari pamlibano nanggi apambadu hekta haiyu.”

“Pabung thadoibu eigi nupi oijage
Mashini eina pamjaba.”

“Nupa macha nangbu nupi angang leitribara.”

“Pabung nachadi nupiga thijadarida pakhangni lanthumshu wattana peiraga lei thadoina eigi nupi oirabadi yamna nungngaina thambigani nachada thadoibu shinnabiyu.”

“Phare adudi nangna thadoibu pamlabadi eina nangngonda changyeng ahumkhak tougani chayeng ahumshida nangna maipakpa tarabadi nangna thadoibu pujakho aduga karigumba nangna changyeng ashibu maithiba tarabadi nangbu eina lemna tharoi.”

“Pabung nacha yajare karamba changyengno eingonda pibiro.”

“Houjikti nungdang tanshinlakle hayeng ayuk anganbadagi nanggi changyeng houragani nang mapham ashida ngashidi leiro.”

Chaothoina shanatombabu makhoigi shan loinaba mapham aduda leihanlammi.
Shanatomba hayeng ahan nupa aduna pirakkadaba changyeng adubu kari oiraba jatno khanduna leirammi.
Matam aduda thadoi shanatombagi manakta lonna changlaktuna hairammi.
“Ebung hayeng eikhoi pabungna pirakkadaba chanyeng khudingmak nachanda hanna haibirammu eina loina takke adu nattrabadi shoidana maithigani madu oirabadi pabungna ebungbu shoidana chabikhini.”

Mashi haiduna emungda changkhi shanatomba thadoina hairamba mapana shanatombabu maithirabadi shoidana chagani hairiba washi tabada wakhal chamamnarammi.
“Karino thadoina hairamliba adubu makhoigi mapa ashibu miga chaba jatla.Natteda minabu karamna mi chagani makhoi mapadu khara chathibagi ei hatkani haiba oiramgani adubu eina maithiba tarabashu ahan mana eingonda karidouba ngamgani hanuba maoina hattoklamduna macha nupi animak eigi nupi oina puraga loire.”

Shanatomba wakhal yamna nungngaijarammi numit aduma lenduna leirammi.
Ashomdana magi nupi ebemchana mapuroibana ashuk thenglaba phaoba laktaba ashida wakhal wajarammi.
Lakmandaba aduda pikliba macha nupibu pokhattuna macha nupa pungkak chaoraba adubuna makhut shamduna khungi mamannabagi yumda chat chattuna hangjarammi,
“Ta tomba eigi nupa adu ayuktagi loubukta chatkhibadagi houjik phaoba hanjinlaktari tatomba hoina thengnarakpara.”

“Ebemcha eidi shanatombabu ngashigi thengnadari eidi ngashi loubuktagi ngannashu karakle.”

“Tatomba adudi ei chatcharage.”

“Thoina khanlunu ebemma shanatombadu maraina hanjarakchanida nang nacha apikpashing aduga nungdang athengba ashida lapna chatthokluranu.”

Ebemcha mapuroibaga tinnaba mamannabashinggi mayumda chat chattuna hangjarammi adubu kana amatana khanglamde.

Upai leitraba mama macha makhoi ahum mayumda handuna manggolda phamduna ngairaga leirammi.
Phana thengjinlakla phaobada hanjinlaktaba ashida emungda changduna leirammi.
Ebemchagi wakhalda khanjarammi,
“Eigi nupa ashibu kari khudongthibaga taraba jatno taibang mapu eigi epuroibabu tekta kaidana yumda hanjinbihanbiyu.”

Ashumna eshorbu ningjarammi.
Ashomdana shanatomba yumda matu macha leihouri haibagi kari amata thawa shadana monda yamna nungngaina leithoklammi.
“Hayengdi eishi nupi mashak phajabi amabu eigi nupi oina yumda purani khanbada wakhalgashi nungngaibana loire.
Adubu einadi thadoigi mapada eishi nupi thidari haina haikhare karigumba eina thadoi puduna yumda chatladi ebemchaga angang anidu tanthoktaba yadare.Makhoina eigi yumda leiduba natte houjikti thdoiga eiga nungngaina leiruradubani.”

Magi wakhalda matu machabu nungshibagi wakhal amata chenlamde magi haibabu mashak matou phajarabi thadoibu magi nupi oina yumda puduna chatpa ashini.
Mathanggi numit yourakle shanatomba thadoigi mapana mangonda ahanba changyeng adu hairammi.
“Nupa macha nanggi ahanba changyeng ashidi eikhoigi yum ashidagi maning pangna chatlaga houba matu chomkharaba yamnashu thouba panbi ashigi manashingshi nangna mapun achouba ama shemduna purakkadabani. Aduga nangna manashing adu purakpa matamda nashada karigumba ama phaoba shokhanlakpa yaroi.”

Shanatomba ahan aduna hairakliba wadu tabada ngaklammi hanuba aduna puraku hairiba panbi adugi mana adu khajiktang thengbada thoumankhiduna ethokhanba ngamba panbi amani ashibu karamna purakkani khanjarammi.
Mana ashum chamamnana panbi adubu hekpa chatlammi matam aduda thadoina magi lambida leptuna ngairaga leirammi.
Thadoina mangonda hangrake,
“Eikhoi pabungna hairakliba panbi adu nangna phanayamna hotnadunashu paiba phaoba ngamloi.”

“Adudi ei karamna touraga purakpa ngamgani.”

“She eina piriba thao ashi nakhutta teishinduna manashing adubu heku adu oirabadi kari amata shoklaroi.”

Thadoina piriba thao adu makhut shinba thungna nanshinduna thoukharaba manashing adubu heklammi.
Houjikti manashing adu pairabashu kari amata shoklamde yamna laina hekpa ngamlammi.chaoraba mapun ama shemduna puraklaga thadoigi mapada shinnarammi.
Thadoigi mapana magi mapun adubu ubada khara shaorapna hairake,
“Eina nangngonda haikhibadi mapun achouba ama haibani nangna karigi ashuk pikpa mapun ama puraklibadi karigino.”

“Pabung shaobikhinu nachana pujarakliba mapun ashi achoubani kanna lakshinkhibagi toubani.”

Mashi haiduna magi mapun adu louthokraklammi.
Mapun adu louthokrakpa matamda manashing aduna mapham adu pungthan thanlammi.
“Phare nupa macha nang mashigi changyeng ashi mai paklabanina mathanggi changyeng ama pirage.”

“Karamba changyengno pibiro.”

“Mathanggi changyeng ashidi eina loiriba chaoraba lamok ashi nangna phaduna piba ngambara yengngu.”

“Pabung lamok ashidi karishu leiba natte eina ngahaktada phaba ngamgani.”

Yamna thawa shadana thadoida kari amata hairamdana lamok adubu yamna laina phaba ngamgani khanduna lamok adubu tannaduna phanaba tourammi.
Mana phana kanna hotnajarammi adubu phaba shungngam ngamlamde masha adu wabanashu yamna choktharammi houjikti ngamlaktraduna thadoi ningshinglake.
Tanja aduda thadoina yengduna leirammi shanatomba thadoigi manakta changshinduna hairammi,
“Thadoi ei nanggi mateng yaodana changyeng ashi maipakpa ngamlaroi eigi mateng amukta pangbiyu.”

“Nangna eigi mateng yaodana changyeng amata maipakpa ngamloi.
adubu nangna hangningdrabashu kaide.”

“Thadoi ei lankhare eigi mateng amukta pangbiyu.”

Thadoina emungdagi hei khara louthokraktuna mangonda pirammi.
“She mashigi hei ashi thamba matamda lamok adu shoidana lakkani mana lakpagi tanja louduna mangaksham aduda thouri ashina huku aduga phaba ngamgani.”

“Phare adudi ei nangna hairiba thabak ashi pangthoklukhige.”

“Ebung mathanggi changyeng ashidi ebunggi thawai phaoba mangbayai aduna nachan eigi nakta hanna lakpiyu.”

Ashumna hairamduna thadoi emungda changkhi.
Shanatomba thadoina hairamba thabak adu pangthoknaba tourammi.
Hei adubu makhada thamduna mana touri paiduna leirammi.
Ngaihak leiraga lamok adu laktuna hei adubu pamna chajarammi.
Tanja adu louduna shanatombana pairiba thouri aduna lamok adugi mangakshamda thuhanlammi.
Houjikti lamok chenninglabashu chenba ngamlamde phana kanna chongphanduna lanthoknaba tourammi adubu upai leitraduna tuminna shanatombana puriba maikeida lakammi.
Shanatombana ahan aduda lamok adushu shinnarammi.
Ahan nupa aduna pikhiba changyengshing ashi nupa pakhang kaya ama pangthokpa ngamdana mathawai mangkhiba ngaktani aduga shanatombana ngamlakpa ashida ngaklammi.
“Nupa macha nangna changyeng ashishu maipaklaba phare adudi eina handak pigaduriba changyeng ashina aroibani mashida nangna thoiba ngamlagana eigi echa nupi thadoibu nanggi nupi oina pujakho aduga karigumba ngamdrabadi nanggi napunshi mapham ashida loigani mashi yarabara.”

“Pabung nacha yajare karamba changyengno pibiro eina touba thabakta ngashi phaoba maipaktaba leite.”

“Phare phare adudi hairage handakki changyeng ashidi eikhoigi umang ashida leiba yamna chathiba
nongsha makok adugi maya athouba adu phuklaktuna eingonda shinnaba ngamgadara.”

Shanatomba wadu tabada masha adu yamna pakhatlammi.
Mibu laina haktuna chaba ngamba shahing chaba nongsha makok adugi mayabu karamna phuktuna purakkani khanjarammi.

“Nupa macha karidoure nang mashigi changyeng ashi ngammaroi haibaro.”

“Pabung nacha ngamgani ei shoidana nongsha maya adu pujarakke.”

“Nupa macha kharadi chekshinna toujou nanggumba pakhang masha mau phakharaba kaya ama nongsha adugi khayatta takharaba ngaktani aduna yamna shingna toujou.”

Shanatomba wadu tabada pakhatpana loirammi mana ngamnidi haidok khare adubu karamna purakkani haibadi khangjaramde handakki changyeng ashidi maipaklaroudara khanduna mayumda kanashu khanghandana chenkhibana pharani khanjarammi.

“Ei yumda hanhoubana pharani ei nongsha adugi khayatta tadri ngei yamna thuna chathourage.”

Mana chenge haina tourakpa matamda thadoina mangonda hairake,
“Ebungna chenge khanlabadi aduna henna khudong thiba oigani aduna pabungna shinnariba thabak adu toubana phagani.”

“thadoi eina karamna nongsha adugi maya phuktuna purakkaduribano.
Ei nongsha adugi makhuta shidui sharukpudi yumda hanlage khanlamlibani.”

“Ebung madugi kari amata wabiganu eina hairiba ashida pangthokpiyu.
She mashigi phina yomliba potshak ashi huren nongshana kunduna leiramba mapham aduda langshinbikho aduga ebungna mashigi phida tariba pot ashi hangdoktuna manam nambiganu karigumba namlurabadi ebung shoidana nongshagi khayatta
tagani.”

“Thadoi nangna hairiba thabak ashimak eina pangthoklage.
Adubu thadoi ei nongshagi makhuttadi shiningde eibu changyeng ashi toktuna yumda hanlashira khanlakle.”

“Ebungna yumda hange hairabashu hanba ngamloi nongshadagi henna chathiba sha amana nangbu shoidana chakhini adubu ebungna apamba toubiyu eina haiba thabakshi oina pangthokke haibara yumda hanbige haibara khanbiro.”

Shanatomba wakhal yamna wajarammi mana khanba yaba khanlaba matungda upai leitraduna thadoina piba hidak adubu puduna nongsha makon tamna lakammi.
Mana ashum lakpada nongshagi makon youshinlakle.
Shanatomba yamna pakhatpa amadi akiba phouraklammi.
Yamna kina tapna changlaktuna nongshagi manakta phi matum adu langshinkhi.
Ngaihak leiraba matungda changduna yengluba matamda nongsha adu tumduna leiramme.
Mana nongshagi maya adubu phaktoktuna maya shatnaba tourammi.
Phana kanna lengla phaobada nongsha adu hougatlakte mana nongshagi maya adubu phujtuna yamna thuna hanlakammi.
Mana purakpa nongsha maya adubu thadoigi mapada shinnarammi.

“Nupa macha eina nangngonda piba changyeng khudingmak maipaklabanina nangna piyu haiba eigi echa thadoi ashi nangngonda shinnarabani aduga eina haigadabadi eigi echa thadoi nattaba atoppa nupi ama thiramba tarabadi nang kaya nungngairoi haibashi khangjinlu.”

Thadoigi mapana thadoibu shanatombagi makhutta shinnarammi.
Shanatomba amadi thadoi mayumda hanlammi shanatomba haraobana kham thengkhare.
Shanatomba thadoibu mayumda puduna lakammi.
Mana yum youbada ebemcha machashingga mabu hanlakpa wana ngaiduna leirammi.
Ebemchana mapuroiba ubada hangjarammi,
“Tamo nahan makhei kadaida chatpirubano.”

“Nangna adu hangbagi mathou tade nakhoi nama nacha ngashidagi yum ashi thadoktuna chatkharo.
Eina purakliba nupi ashi ngashidagi yum ashida eigi nupi oina nungngaina thamlagadubani.
Nakhoigi napot nacheishingdu pukharo.”

“Tamona haibiriba ashibu karino pikliba nacha anishiga eibu kadaida leirusho haibano.tamobu nachashingshi nungshiba phaodrabara.”

“Nanggi nama lukhrabi adugi manakta leirusho nakhoina leiningba mapham amada leirusho madu eingonda hanggaduba natte ei houjikti nakhoiga mari amata thoknadrabani.nakhoi yamna thuna chatkharo.”

“Tamona pamjana purakliba nupi ashi yum ashigi mou ama oihanbiyu ei karishu haijaroi adubu ei yum ashigi minai oina echa anishiga yum ashida leijage mashi matadi yabiyu.”

“Madu yaroi nangna eigi apambada ashuk yamna yekninglibashi karigino houjikmak chatkharo chatlu nachashing ashiga.”

Ebemchana shanatombagi makhong paiduna kapcharammi adubu mapuroibana tanthokpirammi.
Ebemcha thamoi yamna shokna mapuroibada hairammi,
“Phare tamo eikhoi ema echa mapham ashi thadoktuna chatkhini aduga mashimadi khangjinbihou nangna yamna nungshina lourakeba nupi ashigi makhutta nang shoidana nathawai mangba oiyu eikhoidi ngashi haiba numit ashidagi nangga eikhoigagi marakta mari amata leinadare yum ashida nanggi ashiba hakchang adu pumduna pattuna mangba oirashanu.”

Mashi hairamduna mamittagi mapi neithoktuna chatkhi.
Houjikti shanatombagi minungshi leitraba lamchat ashi khungi miyamna khangnarammi.
Khunja miyam laktuna mana touriba thabak ashi phatte matu machashing adu kourusho hairammi adubu shanatombana yamna mi ushittana lakliba miyamdu tanlammi.
Magi ashigumba matou ashida khunja miyamshingna shaoraduna maga amata kounaramde shanatombana awaba tarakpa matamda kana amatana mateng pangnararoi haina lepnakhi.

Shanatomba houjikti thadoiga yamna nungngaina leiminnarammi.
Thadoina chak enshang ahaoba kaya thongthaktuna charammi numit phana yamshinlakla phaobada thadoina mapuroibaga chak chaminnaramde mana yum aduda lakpadagi ngashi phaoba chak maru amaphaoba chaba uramde.
Matou aduda shanatombana hangjarammi,
“Thadoi nangna yum ashida lakpadagi ngashi phaoba chak chaba uraktari eiga chaminnashi haibashu nangna ei loiraga chageda hai mashibu karigino.”

“Tamo eibu chak chadrabadi karamna hinggani tamona thabak chatkhibada uhoudabani.”

Thadoi shanatombagi mayumda leiraklibashi tha ama shujinlakle.
Matam ashida thadoi hannaga mannadana masha adu yamna shokchinlakle.
Magi matou aduda shanatombana hangjarammi,
“Thadoi nanggi nasha ashi handak marakti yamna shokchinlakle maibi ama yenghanbana phagadara.”

“Tamo maibi koubirunu ei tamoda wa ama haige.Tamona eigi yumda chattuna eikhoi pabungda eigi chanaba pirakuda haibiyu eikhoi pabungna khangna pirakkani aduga eikhoi pabungna pirakliba pot adu hangdoktuna yengbirakkanu.”

Shanatomba thadoina hairiba adu hidak oiramba tai khanduna thadoigi yumda chattuna mapada haijarammi,
“Pabung thadoina pabungdagi magi chanaba lourusho haina lakchabani.”

“O nang ngaihak mapan ashida phamlammu ei emungdagi puthokraklage.”

Mashi hairamduna emungda changkhiduna ngaihak leiraga makhum panba thumuk khara chaoba ama puthokraktuna pirake.”

“Shanatomba nangna mashigi pot ashi hangdoktuna yengganu.”

Ngashaishu thadoina mashigi wa ashi chekshinna shinnarake aduga thadoigi mapanashu amuk hairakpa ashida khara chingnajarammi.

“Karino mashigi manungda yaoriba ashibu makhoina hangdoktanaba hairakliba ashibu kayam luba hidakka oiraba jatno.”

Ashumna khan khanduna lakammi
Mayum youraduna thadoida pot adu piramlaga magi thabak chatkhi.
Numit ashidagi thadoi masha adu yamna kankhatlakammi.
Mashak matou yamna phajathoklakammi shanatombagi sheba ningthijana toujarammi.
Shanatomba houjikti thadoida kharak kharak chingnaba houraklammi.
Nongma mana thadoida hairammi,
“Thadoi ngashidi nang eiga chak punna chaminnashi.”

“Tamo ei konna chahourage tamo hanna chabiro.”

“Karigino nangna eiga chak chaminnashi haiba yadriba ashibu.”

“Tamo eikhoigi lamda mapuroiba hanna charaba matungda konna chabagi chatnabi ama lei ashina toubani.”

Shanatomba thadoina hairiba khudingmak thajarammi.
Ashumna tha khara houkhare nongma thadoi yamna thajadana masha adu shonthaba amuk houraklammi.
Handakshu thadoina mapadagi hanna louhankhiba pot adu shanatombada louhanlammi.
Pot adu phangkharaba matunga thadoi masha adu hannagumna kankhattuna mashak matou phajaba hengatlakammi.
Ashigumba matou ashida shanatomba yamna chingnaba hengatlakammi.
Ashumna tha khara leiraba matung khudinggi thadoi masha shontharaktuna mapadagi karino khangdaba pot ama louduna puraklaba matungda hannagumna kanlakpa ashida chingnaba kaya phaorakle.
Mathangshu amuk thadoi masha adu shontharaktuna shanatombada louba chathanlammi.
Thadoigi mapana pot adu chekshinna khumduna shanatombada piraktuna hairake,
“Shanatomba mashigi pot ashi nangna khangninglibadu eina khange adubu nangna pot ashi hangdoktuna yengba shungya yade aduna eigi maron thokpa uchek ashina nangbu yum youba phaoba thigani.”

Shanatomba pot adu puraga lakammi.
Khara shangna lakaba matungda mana pot adu karino khangning manduna hangdoktuna yengge touba matamda uchek aduna hairakammi,
“He nupa adugi pot adu hangdoktuna yenglabadi nang shoidana awa phamda tagani.”

“Uchek karigino nakhoina pot ashibu yengba matamda awaba tagani hairiba ashibu eina yengba yadriba karigino.”

“Nupa nangna thumuk machada yaoriba pot adu hek uruba matamda nanggi nathawai manggaduribani aduna nang shungyeng yengge khanganu.”

Uchek aduna hairakpa aduda shanatomba hangdoktuna yenglamde mayum youraga thadoida pot adu piramduna hairammi,
“Thadoi ei mamang leikaigi etao tomba hoida chatluge khara thengna hanlakkani.”

Mashi hairamduna mapada thokkhi.
Shanatomba chatkhiba shaduna yumgi nakanda phaklang ahoba mapada lumduna thadoida yengduna leirammi.
Thadoigi mapana pirakliba thumuk macha du thadoina hangdoktuna manungdagi migi khubi,khunao kaya louthoktuna thadoina chabadu urammi.
Shanatomba matou adu ubada mashadu tuchunglammi.
“Karino ei na uriba ashibu thadoina chariba ashibu mi makhut nattarane.
Mashidi Ei khangdaba shaduna magi manakta changduna hangdaba yade ngahak leiraga changlage.”

Ashumna khanduna thadoina chariba adu yengduna leirammi.
Thadoina chaba loiraba matungda ngahak leiraga shanatomba thabak chatthokluba hanjinlakpa shaduna thadoida hanglammi,
“Thadoi pabungna pirakliba pot adubu karino ei khangba yadabaro.”

“Tamo thumuk adugi manungda yaoriba pot adu yamna haoba mina chaba phangnadaba pot amani.”

“Yamna haoba pot ama oiraga nangna eingonda pijadribadi karigino.”

“Tamo eikhoi pabungna eigi khakta pirakpani ei phaoba chaba konnade.”

“Thadoi nakhoi pabungna pirakliba pot adu karino kadaida phangbano eina nangngonda nabuk thanna pijage.”

“Tamo eina chariba pot adu eikhoi shawaida yamna phangngi.”

“Ado kari potno eingonda khanghanlu.”

Thadoina pot adu taku yaramde adubu shanatombana hanjin hajin haimanbadagi thadoi khangba ngamdraduna hairaklammi.
“Tamona khangninglabadi hairage aduga mashida thokkadaba phattaba khudingmak tamogi naranni khanduna yajagadubani.”

“Hoi ei punnamak yajare pottuda karino taku.”

“Eina eikhoi pabungdagi louhanduna chariba adu migi makhutni.
Eigi pabung yamna mahei heiba maiba amani eikhoi pabung kei ama oiba ngamba mini mana adumna touba aduna macha oiriba eikhoishu karigumba matamda keionlake eikhoidi mi chaduna hingbani. tamo eina karigumba kei onlaklabadi ei mioibagi wakhal amata chenlaroi aduna tamona mashida leiriba thumuk achouba ashi eigi kokta upshinbiraku.”

Mashigi wahei ashi haibaga thadoi khanghoudana keijao amagi shaktamda onthokraklammi.
Shanatomba yamna pakhatpa phuk laona hougatlaktuna chaoraba thumuk adu loukhatlaga kei adugi makokta upnaba tourammi.
Adubu kei aduna kanba henmankhibana shanatomba karishu upai leiramde houjikti shanatomba chenpham leiramde kei aduna chongshinlaktuna mabu lakammi.
Shanatomba kanna lao khongduna mathawai hingnaba kanbiyu laorammi adubu khunja amatana taramde.
Keina magi masha adu machet machet shettuna charammi.
Shanatomba yamna wana kei adugi makhutta shirammi.

Ashumna mabuk phattaba nupi choppa shanatomba kei nupi adugi makhutta yamna wana shirammi.
Magi ashiba hakchangshu kana amatana khangdabana yum aduda pat pumduna leikhi.